الأحد، 11 ديسمبر، 2011

اتيكيت التعامل من خلال النت








كنت دايماً أدرك ان التعامل مع الناس من خلال النت لازم يكون بالتأكيد ليه ضوابط 


معينة ، اقصد ضوابط سلوكية تتعلق بمراعاة الذوقيات في التعامل ، لغاية ما عرفت


 من احدهم ان فيه شئ اسمه ايتيكت الكتروني وإنه علم بيدرس


وبالفعل فيه حاجات كتير جدا في عالم النت تحتاج لهذا العلم وهذه الاخلاقيات ، فيه


 ناس بتتعامل بما انها خلف ستار النت انها تعمل اللى عيزاه وتتعامل بالشكل اللى 


شيفاه دون مراعاة للآخرين 


ولكن هناك علاقات كتير صداقة وغيرها بتنشأ من خلال النت وممكن تتوثق وتبقى 


اشد من الناس اللى بنقابلهم كل يوم ، لأن الصديق الألكتروني ده اكيد بيكون بينك 


وبينه نقاط كتيرة مشتركة سواء عقلية او فكرية او سلوكية او غيرها


ومع كثير من الاخذ والرد والتعارف تتوثق الصلة خاصة عندما تتحول من اطار 



النت الى واقع وتعارف مباشر




وكانت المواقع الاجتماعية سابقاً زى المدونات مثلا بتدي كثير فرصة انهم يعبروا 

عن انفسهم بكل حرية وطلاقة وبكل ما فيهم طالما انهم مجرد اسماء مستعارة تكتب 


ما تشاء وتعرض عن نفسها ما تشاء 




ولكن مع تطور المواقع الالكترونية فاصبح الوضع مختلف كثيراً ووسائل التعارف 

اصبحت اكثر واصبحت متعددة ايضا من خلال معلومات الشخص وممكن صوره او 


ما يكتبه ويعبر عنه ومن خلال اصدقائه وفكره والكثير


المهم ان المجتمع الافتراضي ده ليه علينا حقوق لإننا بنتعامل مع بني ادمين مش 



مع اجهزة .. !!


وفي الحقوق دى في بعضها اعتقد انه يكون فرض والبعض حاجات كده 



advanced 




وفيه بعض الامثلة عن تعامل البعض مع هذا العالم انه مجموعة من الاجهزة سواء 


لاب توب او كمبيوتر او نت على موبايل :)


1- الشات :

الشات سواء على المازنجر او الفيك بوس .. فيه الكثير بيتعاملوا معاه بنظام لسه 


مش عارفه .. يعنى هما الناس مشكورين مثلا حاطين حالات للى على الماسنجر 

مثلا انه مشغول او بيشرب كوباية شاي او النور مقطوع عشان اللى في حالة من 

الحالات دى يختارها بس ممكن كتير تكلم ناس وتلاقيهم ميردوش مرة واتنين وفي 


اوقات ومواعيد مختلفة ولما تسألهم يكون الرد انهم مشغولين ..!!!


وفيه مثال اسوء من كده انك تكون بتكلم حد وممكن يكون موضوع مهم جدا او مش 


مهم حتى وفجأة تلاقيه فص يوستفندي وداب .. وبرضه اكيد هيكون ليه عذر طبعا 


.. طب ليه بعد ما العذر ده يخلص يدخل حتى لو انت طلعت ويعتذر مثلا كده ..




اعتقد ان الحل الأمثل هو اولاً انك تعتبر اللى بيكلمك ده بنى ادم مش جهاز .. كأنك 

بتكلمه وجهاً لوجه .. مينفعش تتكلم وتبص لاتجاه تاني ومينفعش وانت بتكلمه 


فجأة تسكت او تنشغل بحاجة وبالتأكيد مينفعش وانت بتكلمه فجأة تسيبه وتمشى :) 


الطبيعي لما يكون حد قدامك ويحصل اى عذر تقله يعني لو مش باصصله وانت 


بتكلمه على الاقل يعرف ان رقبتك ملووحة مثلا :) ولما يكون اللى بتكلمه قدامك 

وجهاً لوجه من السهل ان يلتمسلك الاعذار ولكن لما تكون هناك اسوار الكترونية 


بينك وبينه اعتقد الامر يختلف


2- الفيس بوك :



يعنى هنا فيه كثير من الامثلة وبعضها ممكن يكون في إطار الاخلاقيات الاساسية 


وبعضها شئ اضافي وذوقيات عالية 


مثلا مثلا مثلا .. انك تكتب status وحد يعلق ويرد عندك اعتقد المفروض ترد 


عليه من باب الذوق .. يعني اكيد لاقى عندك شئ يثير اهتمامه او انت نفسك تثير 

اهتمامه بغض النظر عن ما تكتب :) .. فاعتقد من ابسط الذوقيات الرد ولو 

بابتسامة ، الا فيما اعتقد في حالات اذا حد رد بتعليق ملوش دعوة بالموضوع مثلا 

او تعليق غير مفهوم أو .. أو



وفيه في بعض الاحيان لما حد يكتب اى كلام كده او سب او ما الى ذلك ، فاعتقد 


وهو ما اقوم به ان اسلم شئ هو حذفه من سكات بدون دخول في اى مهاترات 

خصوصاً ان اللى بيعمل كده اكيد ميعرفكش ويا دوب ضافك كده بس وخلاص فحذفه 


مش بيضر في شئ


وفيه حتت advanced كده علمتها مع صديق من ايام الطفولة وكان الموضوع 


ده ايام الثورة كان هو ضدها وكان الواحد مضغوط بالتأكيد خصوصا لما يتابع 

الثورة عن بعد ومكنش فيه حمل انه يتحاور ويتناقش ويجادل ويقنع .. فرأيت ان 

اسلم شئ عشان مخسروش ان تكون حدود كلامنا بعيدة كل البعد عن السياسة :) 

واتفقنا على كده لانه كذا مرة من النقاشات كان عايز يمسح نفسه من عندي فالنظام 

ده جاب نتيجة كويسة جدا :) وهيعزمني على سحور في الحسين ان شاء الله في 


رمضان :D


وفيه حتة تانية advanced كده بس لسه مش عارف اعملها .. فيه واحد صديق 


قديم اعرفه كويس جدا وكل لما يكتب حاجة على الفيس بوك بيكتبها بأسلوب عجيب 

كده متعرفش بيبقى قصده ايه :) لدرجة انى ساعات بحس انه مش هو .. فتيقنت من 

شئ انه مش بيعرف يعبر عن ما يريد من خلال النت وممكن يتفهم غلط ، فنفسي 


اقله بلاش نتكلم على النت :) بس مش عارف اجيبهاله ازاى


وفيه شئ مهم وهو ردود الفعل عن ما تكتب او تنشر يعني الناس مشكورين حاطين 


حاجة اسمهاlike عشان نستخدمها وبضغطة بسيطة جدا ممكن تحدث أثر كبير ، 

يعني مثلاً انا بنشر كتير من الاوقات اخبار او لينكات حاجات عجبتنى عشان الناس 

تنتفع بيها وكتير اقابل ناس اعرفهم ويثنوا على الحاجات اللى بشيرها بس قليل 

منهم اللى بيكون ليه رد فعل على اللى بيتنشر ده ، الموضوع مش شكر ولكن على 

الاقل فيه فرق لما حد يحس انى اللى بينشره ليه اهمية وحد بيتابعه عشان يستمر 


على الاقل .


وأما عن الجدال والمناقشات الساخنة حيث اصبح الشعب كله بيتكلم في السياسية


 ولكن كتير للأسف متعلموش اداب الحوار أياً كان توجههم وفكرهم فالتعصب بيكون 

لغة الحوار ليس إلا وهؤلاء اما ان ابتعد عن جدالهم او اصمت ، خاصة لما يكون 


الموضوع ده مع شخص عارف انه كثير الجدال ولن يقبل برأي اخر مهما كان .


وفيه بعض الحاجات اللى ممكن الواحد يعملها من قبيل المسلم كالغيث اينما حل نفع 


.. يعني حتة لايك هنا على ابتسامة هنا على تعليق هناك .. مع ناس مش لازم تبقى 

تعرفهم ومش لازم علاقتك بيهم تكون وثيقة بس طالما انك ضفت حد او حد ضافك 

يبقى اكيد فيه بينك وبينه رابط ويستحق منك ده او على الاقل هو شايف انك أهل 


انك تعمل كده معاه .


وفيه بالطبع الكثير من الامثلة وهناك الكثير من الأمور التي من العيب اصلاً ان نذكر 


حتى بها ، بس اعتقد القاعدة الاصيلة في التعامل مع الغير هو انك تعتبره انه كائن 

حي قدامك قد تخطأ في التعامل معه او تسيئ فهمه او العكس ولكن تقدر انه انسان 

ليه حقوق في التعامل كما عليه واجبات بالتأكيد
حتى لا تنجح التكنولوجيا الحديثة ان تجردنا من أثمن وأعظم ما فينا .. انسانيتنا ..

ليست هناك تعليقات:

إرسال تعليق